Ljóð

Í fjarlægð situr foringinn og hrópar
þið verðið að drepa drepa drepa
því vélin verður að éta.
En þeir eiga fullt í fangi
með að halda vélinni í gangi
því vélin vex og vex
og ekki vill hún kex.
Heldur útheimtir hún egg
hin dýrmætustu fjöregg.

Vélin vill þau ekki hrá
og ekki blá, hvað vill hún þá?
Hún vill þau spæld
Spæld fjöregg lítt breyttra karla og kvenna
heilu þjóðirnar á silfurfati
uns hún stendur á gati.

Þó leiðtogar landanna segi stopp
þessi vél sé algjört flopp
hún boði ekkert gott
þá hafa þeir það flott.
Því þeir hafa pata
af því að vélin hljóti skjótan bata
því vélin framleiðir framleiðir gull þeim sem henni eru hliðhollir.

Eins dauði er annars brauð
-mitt kökufrauð.
Og bakaríin eru full
enda malar vélin gull.
Og börnin blæða því egg þeirra eru fæða
Án leyfis eru eggin spæld
skurnin skæld
Heilu hænsnabúin hverfa senn
verða í denn
en það er allt í lagi, þetta eru villutrúa- og hryðjuverkamenn.