Ammoníak

Borðaði skötu í hádeginu, fékk ammoníakeitrun og var fluttur á gjörgæsludeild Fjórðungsjúkrahússins á Akureyri... Nei, ég lýg. Ammoníakið eitraði samt fyrir kvefinu mínu, um stundarsakir.

Skatan bragðaðist samt prýðilega...

Hátíðarbragur í tilefni jóla

Ég óska sjálfum mér til hamingju með að hafa samið, tekið upp ( með dyggri aðstoð) og brennt jólakveðju á geisladiska, fyrir um og yfir 50 manns og sent frá mér sem jólakort.
Til hamingju Ottó...

Svo slepp ég víst úr prísundinni Menntaskólanum á morgun. Verð laus allra mála... um sinn. Fer í jólafrí, langþráð, kannski verðskuldað, veit ekki. En umfram allt, slepp heim á morgun. Vona að Dalvíkin sé undir mig búin. Ég tek kannski fram snjóbrettið mitt í jólapásunni, þ.e. ef nokkur snjór fyrirfinnst á þessari guðsvoluðu eyju norður í ballarhafi...

Bingóhasar

Ég var bingóstjóri í bingói 3ja bekkjarráðs eftir hlé. Skemmti mér náttúrulega konunglega við að lesa upp tölur og viðeigandi nöfn líkt og; Níels 28, Grétar 56 og Ottó 71. Spennan fór stigvaxandi og blóðþrýstingurinn rauk upp úr öllu valdi, ja allvega hjá mér sem fékk blóðnasir og þurfti að hætta keppni.

Ég held að ég finni mér eitthvað rólegra að dunda við eftirleiðis...

Altósaxófónn

Ég aldrei bloggað áður, ef frá er talin þessi tilraunamennska mín hér að neðan. Því veit ég ekki hvað ég á að skrifa eða hvers er krafist af skrifum mínum. Ég lýsti því nú eitt sinn yfir í hroka mínum að ég ætlaði aldrei að fá mér blogg. Fann ekki þessa þörf fyrir að opna sjálfan mig fyrir almannasjónum, en líkt og Bob Dylan söng eitt sinn, þá breytast tímarnir og líklega ég með...

En hvað sem því líður þá langar mig í saxófón...

Bilerí

Er enn að kanna möguleika þessa tjáskiptatækir tuttugustu og fyrstu aldarinnar...

Sjöfréttir

Það er ekkert í fréttum, ég er bara að kanna skilvirkni þessa apparats...

Viðburðaríkur dagur

Í dag gerðist ekki neitt...