Af síðustu dögum...

Hafi einhverjir verið svo hugulsamir að velta því fyrir sér hvar ég hef verið síðustu daga þurfa þeir eigi meir að örvænta í óvissu. Ég neflinlega komst á sjó og hef verið síðasta hálfa mánuðinn. Svo fer ég aftur út á mánudag.

Áhugasömum vil ég benda á Sigurrósartónleika hjá Hálsi í Öxnadal klukkan 22:00 en ég ætla að leggja leið mína þangað sem háir hólar hálfan dalinn fylla...

Svona fór um sjóferð þá...

Ég fer ekki á sjó, allavega ekki í bráð og sit eftir heima með sárt ennið. Ég get svosem engu um kennt nema mínu brenglaða gildismati; sumt verður ekki metið til fjár-MasterCard er fyrir allt annað. Ég lulla því bara í pækilgrindunum í Sæplasti eitthvað lengur og vona að komast með dallinum næsta túr.

Í kjölfarið hurfu svo foreldrar mínir og litli bróðir til Króatíu. Þar sem ég er að fara í útskriftarferð ætlaði ég ekki að fara með og vera á sjó á meðan - en það klikkaði. Ég verð því einn hér heima næstu 18 dagana þannig að nánast hverjum sem er er meir en velkomið að veita mér félagsskap.

Svo ef einhver á miða á Belle & Sebastian tónleika eða þekkir einhvern sem þekkir einhvern sem þekkir einhvern sem þekkir einhvern sem á langömmubróðurdótturdóttur sem heldur tónleikana og getur reddað mér frítt inn í Bræðsluna á Borgafirði Eystri þann 29. júlí nk, má hann gjarnan hafa samband við mig og selja mér miðann eða redda mér símanum hjá langömmubróðurdótturdótturinni...

Hamstrarnir Haddi og Lovísa

Auglýsingar umferðarstofu eru yfirleitt afar áhrifaríkar og vel til þess fallnar að vera víti til varnaðar. Í sundlauginni hér heima á Dalvík hangir uppi ein slík. Í þeirri auglýsingu segir af hjálmlausa hamstinum Hadda sem reynir að ganga í augun á Lovísu (sem er líka hamstur) með hörmulegum afleiðingum. Ég vil sérstaklega vekja athygli á viðbrögðum Lovísu við slysinu sem eru einkar hrottaleg. Hér ber að líta þessa kostulegu auglýsingu.