Hörmungin ein?

Var að reyna að fríkka síðuna.

Tókst það?

Ég legg til...

...að gerð verði álafsteypa af iðnaðarráðherra og báðum komið fyrir á Austurvelli.
...að Þorgerður Katrín fái fálkaorðuna fyrir persónulegt framlag sitt til menntakerfisins
...að James Blunt leiti á nýjar atvinnubrautir, læri einhverja hagnýta iðn og verði samfélaginu að gagni.

Af íslenskuhallærum...

Ég sat sem steinrunninn fyrir framan kassann í gær og glápti á unga Reykvíkinga tala um sitt ylhýra. Þeir tjáðu sig um áhyggjuleysi yfir (fram)þróun íslenskunnar síðustu árin í tenglsum við aukið samband við um heiminn og aukið frjálsræði í tjáskiptum, td. blogg. Fréttamaður tók viðtal m.a. við eina stúlku sem hefur tamið sér það að segja: "Opnaðu dorina!" í stað þess að brúka það sem henni var kennt og segja: "Opnaðu hurðina!". Hún semsagt kaus að nota enska orðið yfir "hurð" þ.e.a.s. "door" með þessum líka hörmulegu afleiðingum. Blessunin réttlætti svo málfar sitt með því að eðlilegt væri að tileinka sér orð til að tungan yrði tamari eða eitthvað álíka gáfulegt. Það er eitt að nota tökuorð úr öðru tungumáli og heimfæra upp á íslensku, en annað að misnota erlend orð í sínu eigin móðurmáli. Mér þótti þetta ankanalega orðaval eins órökrétt og blátt áfram fáránlegt. Hvílíkt orðskrípi, mér blöskraði. Legg til að þessi stúlka verði hneppt í varðhald fyrir aðför að íslensku máli. Og svo finnst fólki þetta bara allt í góðu...

Sökum þessa hef ég kosið að gerast öfgamaður og stofna hreintungufélag á Íslandi.

Prófaspjallið...

Það bar til um þessar mundir, að boð kom frá Jóni Má um að prófa skyldi allan Menntaskólann. Hann sagði: Verði próf. Og það varð próf.

Að sjálfsögðu gengst ég við þessari tilskikkan yfirvalda og læt prófa mig í flestöllu sem ég hef að einhverju marki stúderað í vetur. Núna er mesti hjallurinn að baki, matematíkin. Það er nú undarleg tík... Tík með heildunum og tilheyrandi innsetningaraðferðum og stofnbrotsliðun, tík með línulegri nálgun, tík með þrepunarsönnun og velröðunarreglu. Virkilega margþætt og skemmtileg tík.

Eftir að hafa rutt þessum prófsteinum úr vegi, en þeir eru þrándur í götu minni nú, ætla ég að þéna dulítið. Skilst að hrognavertíðin sé hafin... Ég mun þá líklega salta hrogn í vetrarfrínu. Hlakka annars mikið til að komast heim, NAD T-753.

Áhugasömum vil ég svo benda á að í kvöld klukkan 20;00 mun MA sigra ML í spurningakeppni framhaldsskólanema. Hægt er að hlýða á ómþýðar raddir bera okkur visku eigendana á Rás 2.

Áhugasömum vil ég ennfremur benda á að kynna sér músíkina úr rokkóperunni Jesus Christ Superstar. En hún er einmitt sisvona líka alveg hreint sérdeilis prýðilegt áhlustunarefni. Ég mæli þó sérstaklega með þeirri útgáfunni þar sem Ian nokkur Gillian ljær Jésúm rödd sína...

Hvenær drepur maður mann, og hvenær drepur maður ekki mann?

"Sannleikurinn er það, sem þú veist best um sannleikann."

Jónas Kristjánsson fyrrverandi ritstjóri DV í Kastljósinu miðvikudaginn 11. janúar

Legið á hleri á kaffihúsi í Zurich:

Die Frau: Ich möchte gern bestellen...
Der Ober: Ja, wir haben Schweinhund mit Schnauzer.
Die Frau: Das gefallt mir sehr gut, kann ich auch Sahne haben?
Der Ober: Tut mir leid, die Sahne it krank haute.
Die Frau: Das ist schlect.
Der Ober: Sonnst noch etwas?
Die Frau: Nein, danke.
Der Ober: Kommt sofort...

Fyndinn ég...

Stanslaust stuð, að eilífu...

Ég held að hátíðir á borð við þessar, sem brátt renna nú sitt skeið, fái meir á mann heldur en "venjulegu" dagarnir. Maður verður svo dasaður eftir svona tarnir og nú ber svo við að ég er farinn að hlakka til að byrja að nýju í skólanum, þó svo að prófin séu á næsta leiti. Hlakka til þess að regla komist á hlutina.

Kannski hálfleiðinlegt raus í mér, veit ekki. Jólin hafa samt sem áður verið fram úr hófi ljúf, alveg hreint sisvona líka sérdeilis prýðileg afslöppun.

Má þó til með að minnast á skemmtiferð mína í Sjálfstæðishúsið í gærkvöldi (Gamlársdag), en þar var stanslaust stuð. Páll Óskar þeytti skífum sínum um danssalinn og tryllti misþyrst íslensk ungmenni og gamalmenni með afar fágaðri sviðsframkomu. Palli fær prik í kladdann.

Lesendum vil ég svo benda á að gera allt sem í þeirra valdi stendur til að nálgast lagið "Achtung X-mas" með sænsku gleðipoppurunnum í hljómsveitinni "Tyskarna fran Lund". Þetta er frábær lagasmíð og einstaklega vel til þess fallinn að hleypa lífi í lappirnar...